• पर्यटन पूर्वाधार निर्माण ,कार्यक्रम कार्यान्वयन आवश्यक : व्यवसायी

    पर्यटन पूर्वाधार निर्माण ,कार्यक्रम कार्यान्वयन आवश्यक : व्यवसायी

    काठमाडौँ / पर्यटन क्षेत्रलाई आर्थिक समृद्धिको प्रमुख आधारका रुपमा लिएको सरकारले यसको पूर्वाधार विकास र प्रवद्र्धनात्मक गतिविधिलाई तीव्रता दिने भएको छ ।

    संघीय संसद्को दुबै सदनको संयुक्त बैठकमा सरकारले सोमबार प्रस्तुत गरेको आर्थिक वर्ष २०७५/७६ को नीति तथा कार्यक्रममा पर्यटन पूर्वाधार निर्माण, प्रचारप्रसार र पर्यटक अनुकूल सेवा सुविधा उपलब्ध गराउने लक्ष्य लिएको हो ।

    गुणस्तरीय पर्यटकको संख्या वृद्धि गर्ने नीति लिएको सरकारले प्रचलित पर्यटकीय गन्तव्यको विकास र स्तरोन्नति गरी थप पर्यटकीय गन्तव्य पहिचान र विकास गर्ने कार्यक्रमलाई समेत प्रमुख प्राथमिकतामा राखेको छ ।

    पर्यटन क्षेत्रका महत्वपूर्ण विषयवस्तु समेटिएको नीति तथा कार्यक्रम पर्यटनमैत्री रहेको भन्दै पर्यटन व्यवसायीले यसको प्रभावकारी कार्यान्वयनमा जोड दिएका हुन् ।

    पूर्वाधार निर्माण, प्रचारप्रसार र पर्यटक अनुकूल सेवा सुविधा विस्तार गर्ने लक्ष्य सकारात्मक रहेको र छुटेका कतिपय विषयलाई आगामी बजेटमा समावेश गरिनुपर्ने उनीहरुको सुझाव छ ।

    महत्वपूर्ण पूर्वाधारको रुपमा रहेको अन्तराष्ट्रिय विमानस्थल निर्माणको तीव्रतालाई व्यवसायीले सकारात्मक भनेका छन् ।

    ट्रेकिङ एजेन्सीज एशोसिएसन अफ नेपालका अध्यक्ष नवराज दाहालले तुलनात्मक रुपमा नीति तथा कार्यक्रमले पर्यटन क्षेत्रमा आशा जगाउने विषयवस्तु समेटेको बताउनुहुन्छ ।

    नियन्त्रित क्षेत्र मुस्ताङ, डोल्पालगायत पर्यटकीय गन्तव्यको सहजीकरण र पर्यटन प्रवेश शुल्कलाई एकद्वार प्रणालीको व्यवस्था गरिनुपर्ने उहाँको सुझाव छ । आगामी पाँच वर्षभित्र प्रतिव्यक्ति आय दोब्बर बनाइने र दिगो विकासको लक्ष्य पूरा गर्ने लक्ष्य लिएको सरकारले कृषि ऊर्जा, उद्योग र पर्यटनलाई आर्थिक विकासका संवाहकका रुपमा अगाडि बढाएको छ ।

    पर्यटन बोर्डका सञ्चालक समिति सदस्य दीपक महतले नीति तथा कार्यक्रममा समेटिएका विषयलाई प्रभावकारीरुपले कार्यान्वयनमा लैजानसके पर्यटन क्षेत्रले ठूलो फड्को मार्ने बताउनुहुन्छ ।

    विमानस्थल निर्माण, पदयात्रा स्तरीकरण गर्ने तथा गुणात्मक पर्यटक भित्र्याउने सरकारको नीति सान्दर्भिक छ भन्दै उहाँ नेपाल भ्रमण वर्ष सन् २०२० को तयारीका लागि आवश्यक कार्यक्रमलाई पनि बजेटमा समावेश गरिनुपर्नेमा जोड दिनुुहुन्छ ।

    सन् २०३० सम्म करिब ५० लाख पर्यटक भित्र्याउने लक्ष्य लिएको सरकारले सन् २०२० सम्म १५ लाख पर्यटक पु¥याउने कार्यक्रम तय गरेको छ । सन् २०१७ मा दश लाख पर्यटक नेपाल आएका थिए । सन् २०१८ को चार महिनामा करिब चार लाख पर्यटकले नेपाल भ्रमण गरेको नेपाल पर्यटन बोर्डले जनाएको छ ।

    समग्रमा नीति तथा कार्यक्रम पर्यटनमैत्री भएको र पर्यटकीय पूर्वाधारलाई तीव्रता दिइनुपर्ने प्यासिफिक एसिया ट्राभल एशोसिएसन पाटा नेपाल च्याप्टरका अध्यक्ष सुनिल शाक्य बताउनुहुन्छ ।

    “नीति तथा कार्यक्रम पर्यटन क्षेत्रका लागि सकारात्मक छ । मुख्य कुरा पूर्वाधार नै हो विमानस्थलको विषय प्राथमिकतामा पर्नुले निकै आशा जगाएको छ,”–उहाँ भन्नुहुन्छ ।

    होटल एशोसिएसन अफ नेपाल (हान ) का महासचिव विनायक शाह पनि अहिलेको स्थिर सरकारले पर्यटन क्षेत्रका महत्वपूर्ण विषयलाई समेटेर ल्याएको नीति कार्यक्रम उत्साहजनक रहेको र कार्यान्वयन पक्षलाई प्रभावकारी बनाइनुपर्ने खाँचो औंल्याउनुहुन्छ ।नेपालको हवाई उड्डायन क्षेत्रलाई थप सुरक्षित र प्रभावकारी बनाउन उच्चतम् प्रविधिको प्रयोग गर्ने समेत नीति तथा कार्यक्रममा उल्लेख छ ।

    सरकारले हाल निर्माणाधीन गौतमबुद्ध विमानस्थल निर्माण गरी एक वर्षभित्र सञ्चालनमा ल्याउने, पोखरा क्षेत्रीय अन्तर्राष्ट्रिय विमानस्थल तीन वर्षभित्र निर्माण गरी सञ्चालन गर्ने लक्ष्य लिएको छ ।

    यस्तै बाराको निजगढमा निर्माण हुने दोस्रो अन्तर्राष्ट्रिय विमानस्थल निर्माण कार्य शुरु गरिने तथा त्रिभुवन अन्तर्राष्ट्रिय विमानस्थलको हवाई क्षेत्र, हवाईमार्ग र विमानस्थलको पुनःसंरचना, स्तरोन्नति र विस्तार गर्ने विषय समेत नीति तथा कार्यक्रममा समेटिएको छ । स्रोत : रासस

    जेठ ९, २०७५

    तस्विर : देशका अधिकांश: क्षेत्रका पदयात्रा मार्गमा आवश्यक पूर्वाधारको अभाव छ / नेपाल टुर न्यूज

    • समाचार छोटकरी —

      नेपाल आउने विदेशी पर्यटक वृद्धि

      काठमाडौँ - सन् २०१७ को मे महिनाको तुलनामा सन् २०१८ को मे महिनामा नेपाल आउने विदेशी पर्यटकको संख्या ९.६ प्रतिशतले वृद्धि भएको छ ।अध्यागमन विभागको तथ्यांकअनुसार सन् २०१८ को मे मा ६८ हजार ८२५ विदेशी पर्यटकले नेपाल भ्रमण गरेका छन् । यो सहित पाँच महिनामा चार लाख ५४ हजार ८५५ विदेशी पर्यटक नेपाल आएका छन् ।

      तेस्रो हिमालयन ट्राभल मार्ट जुन ७–९ ,२०१९ मा

      काठमाडौँ - हिमालयन ट्राभल मार्ट तेस्रो संस्करण आगामी वर्ष जुन ७ देखि ९ सम्म आयोजना हुने भएको छ । अन्तर्राष्ट्रिय ट्राभल ट्रेड मेलाको रुपमा स्थापित हिमालयन ट्राभल मार्ट बी–टु–बी प्रवद्र्धन मञ्च बनेको छ । मार्टको पहिलो दुई संस्करणहरु सन् २०१७ मा ५३ देशहरुवाट २२५ विदेशी प्रतिनिधिहरु तथा र सन् २०१८ मा ३६ देशहरुवाट १७० भन्दा बढी विदेशी प्रतिनिधिहरुको सहभागिता थियो /

      हनुमानढोका दरबार संग्रहालय सञ्चालन

      काठमाडौँ / तीन वर्षदेखि बन्द रहेको विश्व सम्पदा सूचीमा सूचीकृत हनुमानढोका दरबार क्षेत्रको संग्रहालय सञ्चालनमा आएको छ । विसं २०७२ वैशाख १२ गतेको भूकम्पले नासलचोकमा रहेको संग्रहालय भवन पूर्णरुपमा क्षति भएपछि ऐतिहासिक सामग्री संग्रह गरिएको स्थल बन्द भएको थियो / हनुमानढोका क्षेत्रको भ्रमणमा जाने पर्यटकलाई केही सामग्री देखाउने उद्देश्यले संग्रहालय दरबारको ढुकुटीमा सञ्चालन गरिएको छ ।संग्रहालय रहेको भवन  पूर्णतः बन्न अझै तीन वर्षभन्दा बढी समय लाग्नेछ /

       

      कीर्तिपुर - एक गन्तव्य

      यात्रा नेपाल

      सुन्दर चीन:एकीकृत पर्यटन वर्ष २०१८

      [table “4” not found /]

      नेपाल भ्रमण वर्ष - २०२०